Kapitulli i hadithit

Përgjigjja: Nëna e besimtarëve, Ajshja (Allahu qoftë i kënaqur me të!) transmeton se Pejgamberi ﷺ ka thënë: "Kushdo që shpik në çështjen (fenë) tonë diçka që nuk është e saj, ajo gjë është e refuzuar." (Hadithin e shënojnë Buhariu dhe Muslimi)
Dobi të nxjerra nga hadithi:
1) Ndalohen risitë në fe.
2) Veprat që janë risi janë të refuzuara dhe të papranuara.
Hadithi i tretë

Përgjigjja: Omeri (Allahu qoftë i kënaqur me të!) tregon: “Një ditë, ndërsa rrinim ulur tek i Dërguari i Allahut ﷺ u shfaq një njeri fort rrobëbardhë e tejet flokëzi, tek i cili nuk vëreheshin shenja udhëtimi. Atë nuk e njihte asnjëri prej nesh. U ul pranë Pejgamberit ﷺ duke i vendosur gjunjët e tij afër gjunjëve të të Dërguarit e duke i vënë shuplakat e duarve të tij mbi kofshët e veta, me ç’rast pyeti: “O Muhamed, më trego për Islamin.” I Dërguari i Allahut ﷺ tha: “Islami është të dëshmosh se nuk meriton të adhurohet askush përveç Allahut dhe se Muhamedi është rob dhe i dërguar i Tij, të falësh namazin, të japësh zekatin, të agjërosh Ramazanin dhe të kryesh haxhillëkun (këtë të fundit) po pate mundësi.” Ai i tha: “Ashtu është.” Ne u çuditëm, ngase vetë e pyeste, vetë ia vërtetonte! Ai tha: “Më trego për besimin (imanin).” I Dërguari tha: “Besimi është të besosh në Allahun, në melekët, në librat e Tij, në të dërguarit, në Ditën e Fundit dhe të besosh në paracaktimin (kaderin), qoftë i mirë apo i keq.” Ai i tha: “Ashtu është. Më trego për ihsanin (përsosurinë).” I Dërguari tha: “Ta adhurosh Allahun sikurse të jesh duke e parë Atë. Edhe pse ti nuk e sheh Atë, Ai gjithsesi të sheh ty.” Ai i tha: “Më trego për Kiametin.” I Dërguari tha: “Në lidhje me këtë i pyeturi nuk di më shumë sesa pyetësi.” Ai i tha: “Atëherë, tregomë për shenjat e tij.” I Dërguari tha: “(Kiameti vjen) kur robëresha ta lindë zonjën e saj dhe kur t’i shohësh këmbëzbathurit, të zhveshurit, fukarenjtë e barinjtë e deleve duke garuar për të bërë ndërtesa sa më të larta.” Pastaj, ai u largua, kurse ne qëndruam për një kohë. Më pas, i Dërguari më tha: “O Omer, a e di kush është ai që pyeste.” Unë thashë: “Allahu dhe i Dërguari i Tij e dinë më mirë.” Ai tha: “Ai qe Xhibrili, erdhi për t’jua mësuar fenë.” (Hadithin e shënon Muslimi)
Dobi të nxjerra nga hadithi:
1) Përmendja e pesë shtyllave të Islamit, e të cilat janë:
- Dëshmia "la ilahe il-la Allah Muhammedun Resulullah",
- falja e namazit,
- dhënia e zekatit,
- agjërimi i ramazanit, dhe
- kryerja e haxhillëkut.
2) Përmendja e gjashtë shtyllave të Imanit, e të cilat janë:
- Besimi në Allahun,
- në melekët,
- në librat,
- në pejgamberët,
- në ditën e fundit, dhe
- në kader, paracaktimin e të mirës dhe të keqes nga Allahu i Lartmadhëruar.
3) Përmendja e shtyllës së Ihsanit, e cila nënkupton adhurimin e Zotit sikurse je duke e parë, sepse edhe pse ti nuk e sheh Atë, Ai të sheh ty.
4) Çështja e kohës kur do të ndodhë kiameti e që nuk e di askush tjetër pos Allahut të Gjithëdijshëm.
Hadithi i katërt

Përgjigjja: Ebu Hurejre (Allahu qoftë i kënaqur me të!) transmeton se Pejgamberi ﷺ ka thënë: “Besimtarët me besimin më të përkryer janë ata me moralin më të mirë.” (Hadithin e shënon Tirmidhiu dhe e vlerëson si hasen-sahih)
Dobi të nxjerra nga hadithi:
1) Nxitja për moralin e mirë.
2) Përsosja morale është prej përsosjes së besimit.
3) Imani shtohet dhe pakësohet.
Hadithi i pestë

Përgjigjja: Ibn Omeri (Allahu qoftë i kënaqur me të!), transmeton se Pejgamberi ﷺ ka thënë: "Ai që betohet në dikë tjetër përveç Allahut, ka bërë kufër ose shirk." (Hadithin e shënon Tirmidhiu)
Dobi të nxjerra nga hadithi:
1) Nuk lejohet të betohesh në dikë tjetër pos Allahut të Lartësuar,
2) Betimi në dikë pos Allahut të Lartësuar është shirk i vogël.
Hadithi i gjashtë

Përgjigjja: Enesi (Allahu qoftë i kënaqur me të!) transmeton se Pejgamberi ﷺ ka thënë: “Nuk ka besuar ndokush prej jush derisa të më dojë më shumë sesa prindin, fëmijën dhe të gjithë njerëzit e tjerë.” (Hadithin e shënojnë Buhariu dhe Muslimi)
Dobi të nxjerra nga hadithi:
1) Pejgamberin ﷺ duhet ta duam më shumë se çdo njeri tjetër.
2) Dashuria për Pejgamberin ﷺ është prej plotësimit të imanit (besimit).
Hadithi i shtatë

Përgjigjja: Enesi (Allahu qoftë i kënaqur me të!) transmeton se Pejgamberi ﷺ ka thënë: "Nuk beson asnjëri prej jush derisa t'ia dojë vëllait të tij atë që ia do vetes!" (Hadithin e shënojnë Buhariu dhe Muslimi)
Dobi të nxjerra nga hadithi:
1) Besimtari duhet t'ua dojë besimtarëve të mirën siç ia do vetes, dhe
2) Dashja e së mirës për besimtarët është prej plotësimit të besimit.
Hadithi i tetë

Përgjigjja: Ebu Seidi (Allahu qoftë i kënaqur me të!) transmeton se Pejgamberi ﷺ ka thënë: “Pasha Atë në dorën e të Cilit është shpirti im, ajo (surja el-Ihlas) vlen sa një e treta e Kuranit.” (Hadithin e shënon Buhariu)
Dobi të nxjerra nga hadithi:
1) Vlera e sures el-Ihlas (Kul huvallahu ehad).
2) Vlera e saj është sa një e treta e Kuranit.
Hadithi i nëntë

Përgjigjja: Ebu Musai (Allahu qoftë i kënaqur me të!) transmeton se Pejgamberi ﷺ ka thënë: “(Thënia) La haule ve la kuvete il-la bil-Lah (Nuk ka lëvizje e as forcë pa dëshirën e Allahut) është një ndër thesaret e Xhenetit.” (Hadithin e shënojnë Buhariu dhe Muslimi)
Dobi të nxjerra nga hadithi:
1) Vlera e kësaj fjale dhe se ajo është thesar i Xhenetit.
2) Besimtari nuk mbështetet në fuqinë dhe mundësinë e vet, por i mbështetet vetëm Allahut të Gjithëfuqishëm.
Hadithi i dhjetë

Përgjigjja: Nu’man ibn Beshiri (Allahu qoftë i kënaqur me të!) transmeton se e ka dëgjuar Pejgamberin ﷺ duke thënë: “...Vini re, në trupin e njeriut është një copë mishi, që, nëse ajo është në rregull, tërë trupi është në rregull, por, nëse ajo prishet, prishet i tërë trupi. Kini kujdes, ajo është zemra.” (Hadithin e shënojnë Buhariu dhe Muslimi)
Dobi të nxjerra nga hadithi:
1) Në devotshmërinë e zemrës fshihet rregullimi i brendshëm dhe i jashtëm i njeriut, pra besimi dhe sjelljet e tij.
2) Përkushtimi për devotshmërinë e zemrës sepse prej saj varet edhe udhëzimi i njeriut në rrugën e drejtë.
Hadithi i njëmbëdhjetë

Përgjigjja: Muadh ibn Xhebeli (Allahu qoftë i kënaqur me të!) transmeton se Pejgamberi ﷺ ka thënë: "Ai, fjala e fundit e të cilit është "la ilahe il-lallah", do të hyjë në Xhenet." (Hadithin e shënon Ebu Davudi)
Dobi të nxjerra nga hadithi:
1) Vlera e dëshmisë "la ilahe il-la Allah" dhe se robi me të hyn në Xhenet.
2) Vlera e atij që vdes ndërsa fjalën e fundit nga kjo botë e ka dëshminë "la ilahe il-la Allah".
Hadithi i dymbëdhjetë

Përgjigjja:
Abdullah ibn Mes’udi (Allahu qoftë i kënaqur me të!) transmeton se Pejgamberi ﷺ ka thënë: “Besimtari nuk është fyes, as mallkues, as i pandershëm e as fjalëndyrë.” (Hadithin e shënon Tirmidhiu)
Dobi të nxjerra nga hadithi:
1) Ndalimi i fjalëve të këqija, çfarëdo qofshin ato.
2) Besimtari dallohet për ruajtjen e gjuhës së tij, pra të folurit e mirë është tipar i besimtarit.
Hadithi i trembëdhjetë

Përgjigjja: Ebu Hurejre (Allahu qoftë i kënaqur me të!) transmeton se Pejgamberi ﷺ ka thënë: "Ndër shenjat e Islamit të mirë të njeriut është lënia e gjërave që nuk i përkasin." [Hadithin e shënojnë Tirmidhiu dhe të tjerë]
Dobi të nxjerra nga hadithi:
1) Braktisja e gjërave të cilat nuk paraqesin interes fetar dhe as material.
2) Braktisja e këtyre gjërave është shenjë e përsosjes së fesë te besimtari.
Hadithi i katërmbëdhjetë

Përgjigjja: Abdullah ibn Mes’udi (Allahu qoftë i kënaqur me të!) transmeton se Pejgamberi ﷺ ka thënë: “Ai që e lexon një shkronjë nga Libri i Allahut, ka një shpërblim i cili shtohet dhjetëfish. Nuk them se elifi, lami dhe mimi janë një shkronjë, por elifi është një shkronjë, lami një shkronjë dhe mimi shkronjë më vete.” (Hadithin e shënon Tirmidhiu)
Dobi të nxjerra nga hadithi:
1) Vlera e leximit të Kuranit.
2) Për çdo shkronjë që lexon nga Kurani ke shumë shpërblime.